هولاند الطماع..!

تلقى سيدي عزيزو مكالمة من عند هولاند مهنئا صاحب العز على نجاحه الذي بهر به العالم أجمع خاصة أنه كان على كرسي متحرك و منافسيه جميعهم على أقدامهم ومع ذلك قدر عليهم بالضربة القاضية.
مبروك مبروك يا عزيزو خويا والله نستعرف بك هكذا يكون الزعماء ولا بطل والله ادهشتني في قدرتك على الاصرار في حكم الدزاير.
قهقه سيدي عزيزو وجاوبه ...لازم تكون جزايري باش تفهم
رد هولاند صحيح أنا عرفت امرأة قامت القيامة عليا و انت أسكتت شعب كامل ولم يقدر اي كان على حل فمه أعطيني لا روسات يا خويا
جاوبه عزيزو .لازم تخلص
زعف هولاند ورد ..واش نخلص يعني أنت تتصور لو لم تكن فرنسا الى جانبك كنت تربح؟
تنحنح عزيزو وقال ...نربح بيكم ولا بلا بيكم أنتمم فقط توهمون العالم أنكم تحشرون أنفكم في كل شيء والحقيقة بعيدة عنكم تماما.
جاوبه ...أنت مخطئ لو كان ما حبيناش والله ما تشوفها
قهقه عززيو من جديد وقال ...وانت علاش راك زعفان ياخي ماشي بلادك
قال هولاند ..أنا عهدة واحدة راني حاصل فيها واقيلا نعدل الدستور
رد عزيزو ...ما نقولك ايه ما نقولك لالا أنت شوف شعبك كيفاش داير إلا كان كما شعبي ساهل
تنهد هولاند وقال ..المصيبة في هذا الشعب يفهم بزاف
قال عزيزو ...شبعتوه ديموقراطية إذن ما عليك غير تخلص
بكي هولاند ..اريد عهدة ثانية وثالثة ورابعة ...كما أنت يا عزيزو خويا
وضع عزيزو السماعة على بكائه وقال له يبدو ان الخط انقطع و تنتحنح على كرسيه وقال أنا استمتع بالفوز وهو يبكي عند راسي ياخي طماع ياخي روح شوف كيفاش تسلك راسك ليس كل الحكام اذكياء مثلي عمبالو ساهلة.