السي المولود حمروش

أخذت بعضي إلى شارع البشير الإبراهيمي أو "بوارصون" كما يحلو لألسنة الفرانكوفون تسميته.. لا تظنوا أني ذهبت حتى أتجسس على بوتفليقة لا والله ثم إن الرجل في فترة نقاهة لماذا أزعجه بخزعبلاتي..
طريقي إلى بوارصون كان تحديدا إلى المنعرج الذي توجد فيه شجرة الورد البنفسجي الذي جمع بين بيت بومدين وبيت حمروش.. نعم حمروش هو مقصدي لأن بومدين ضاع منذ زمن ولن نرى مثله حتى لو نوّر الملح.
طرقت باب حمروش ودخلت فوجدت عنده جماعة ملمومة على التاي وقلب اللوز ومصطلح يتردد بكثرة هذه الأيام وهو الرئاسيات.
قلت واش السي المولود رايح تولي رئيس راك بديت دير فالحملة تاعك؟
عرضني على عضة قلب اللوز ورشفة أتاي وقال لي أعلاش راني مهبول؟ اسمعي يا الكحلوشة اللي راح وقتوا ما يطمع في وقت الناس؟
إستغربت وقلت اعلاش واقتاش كان لازم تكون رئيس وما كنتش؟
قال والجمع كله يسمع خلي البير بغطاه يا الكحلوشة ايه ادنيا دوارة.
قلت.. واقيلا تكلخت بزاف يالسي المولود؟
نهض من مكانه ودوّر بين أصابعه سيجاره المشتعل وقال كاين واحد امشيو موراه.
قلت له ضاحكة.. تقصد السي علي.. ههه لا أقصد علي بلحاج بل أقصد بن فليس صحيح؟
هز برأسه وقال.. نعم أرى فيه مستقبل الجزاير.
قلت ماعلاباليش يالسي المولود أعلاش أنا نشوفو بلا كاريزما وزيد ماشي وقتو ضركا بالاك من بعد ممكن يعني بعد سنوات من ضرك
أطفأ حمروش سيجاره بقوة وقال.. انتوما شعب تحبوا الشيوخة أنا نقولك بن فليس انت تقولي ماشي وقتو خلاص خلوه نهار يولي شيبوخ وشيخ كما حالتي وروحو حللوه كما راكم تحلوني أنا وزروال.. صح انتوما شعب تاع دبوز هيا اخرجوا عليا اخرجو اعليا.. شعب ما يحشمش!