بوقالات9

محمد‮ عجايمي لو كان السعد ينشرى بالمال نشريه ونخبيه ليّامي، ولو كان الهدرة الزايدة ينحّوها بالكتبة نروح نحوّس على كتاتبي يرسخ كلامي، بذرتي كبرت وتسوست واللي يشوفها تسوّس معاها تاني، إن شاء الله برك الناس تتفكر بعدما تيبس البذرة في ترابها واحد اسمه محمد عجايمي!
فتيحة‮ بربار
فال يا فلفال روح شوف زمان كي كنت في عايلة كي الناس، وقبلها بسنين... فتيحة لما كانت ضاوية كي الألماس، واليوم عاد الفن عفن... والفنان الكبير ينهمل وينقاس، ورجعت فتيحة بربار تبان في المسلسل غير باه تشبع تحواس!
أسماء‮ جرمون
مريت على سيد الملاح قالي شكون انتيا شكون، رديت وخبرتو باسمي جرمون، قالي ياخي انتيا اللي تحجبتي بعدما غنيتي ومثلتي في التلفزيون، قلت ايه بصح يا لو كان البذرة فيه جزء ثالث نعاود نحّيه بالتلفون، ناض عليّ وقال يا حسراه، انتيا تمرة وأنا حسبتك عرجون!
سيد‮ أحمد‮ أقومي
مديت لقاع البير واسمعت الناس يلوموني، قالوا يا مول البوقالات راك هملت رقم عشرة في الفن وهو كيما بلومي، رديت الذاكرة تفكرت بلي الناس عندها الحق ولازم بعد رمضان يحاكموني، كيفاش ننسى بلي الفن في بلادي مسّوس إذا ما كانش فيه سيد أحمد أقومي!
جميلة‮ عراس
وين‮ غبت‮ يا‮ زهري‮ من‮ دون‮ الناس،‮ نكرليك‮ براح‮ ولا‮ حتى‮ نشوفلك‮ واحد‮ عساس،‮ أنا‮ اللي‮ كان‮ الجميع‮ يعملي‮ حساب‮ ويقولوا‮ ديروا‮ كيما‮ جميلة‮ عراس،‮ وليت‮ في‮ الشتا‮ نرقد‮ بزاف‮ وفي‮ الصيف‮ ندور‮ برك‮ في‮ الأعراس‮!‬