بوقالات11

الطاهر‮ وطار حليت باب القصر لقيت الحوّات واقف يستنى، خبرني وقالي مول اللاز حبّس الكتبة... العديان ما خلوه يتهنى، قتلو وعلاش ماشي هو كاتب عالمي وتصالح مع خليدة مولات الحنة، ردّ بتنهيدة وقال كان غالط... وقت الاشتراكية ماشي كيما سنين الفتنة، غلقت بابي ورجعت بعدما عرفت بلي‮ الطاهر‮ وطار‮ هو‮ اللي‮ باع‮ الحوات‮ وبدل‮ قصر‮ الشعب‮ عند‮ الحكومة‮... بسُكنة‮!
إنعام‮ بيوض
ترجمت كتاب وصعابت عليّا حروفو، قالو المثقف مشتاق منصب وينقلب على حبابو بعدما يشوفو، رديت وسقسيت... وعلاش إنعام بيوض رجعت فرعونة ومعهدها كيما معبد خوفو... حرام يا ناس شوفو مليح شوفو... قالو لي ماراناش غالطين وريحة الفضايح خلاّت كل مسؤول يغلق نيفو!
الشيخ‮ جلول
رشيت باب الجامع وقلت يا حبابي وين راكم... وين راه القرآن النافع، ما ردّ عليا حتى واحد لبست طربوشي ولّيت على طريقي نحوّس على كاش واحد بيا سامع، ومن بعيد ناداني صوت وقالّلي... أنا بيك سامع بصح بالتوبة نتاعك مارانيش قانع...!
صونيا
يا حسراه على سنين كنت فيها بالمسرح والتلفزيون نجمة، وين راه مجوبي يخبركم على زماني... ما تجوز عليه غير الرحمة، واليوم رجعت وجه جديد نبان غير باش ننضرب بالكفّ ولا نقول في ثلاثين حلقة... كلمة!
حكيم‮ دكار
فال يا فلفال... شفت الناس في السوق متلايمين على جحا صغار وكبار، قلت راني شايفو بصح وين... يليق واحد يعطيني شي أفكار... قالي صاحبي بالاك شفتو في زاوية من الحُضّار... قلت لالا، رد بالاك شارك في رالي دكار... قلت أواه لالا... صاحبي تنارفا وقال... هذا ما يكون غير‮ جاركم‮ الخضّار‮... رديت‮ وقلت‮ لالا‮... تفكرت‮ هذا‮ يلعبها‮ حكيم‮ بصح‮ راهو‮ مريض‮ ومعمّر‮ أضرار‮!