زوجتي

تمنيتك نتي وحبيتك نتي ومن غيرك انتيا والله ما عندي نتيا هي حبيبتي ونتيا زوجتي الي ونستيني بعدما كنت وحدي
بعدماكنت تايه ونضيع في وقتي شمال ويمين الريح فيا يدي
تايه ونحوس شريكة لحياتي والي نشوفها نقول واقيلا هاذي
تم تم نحبها ونمدلها نيتي نمدلها قلبي ومن كل ما عندي
نمدلها حبي حنانتي وحمايتي والحاجة الي فجيبي دايما فيدي
وساعات نمد من فوق طاقتي غير ترضى هي ونكون أنا راضي
واذا ما كانوش نلهيها بحكايتي باش ما تعرفش بلي دورو ما عندي
كي تخلاص لحكاية نقوللها عييتي من كثرة المشية هاني فيا شدي
انايا زوالي وهاذي هي حالتي راكي عرفتيها لا بغيتي تقعدي
وتعيشي معايا باش تكوني زوجتي أو والله ما نلومك ايلا بغيتي تبعدي
لتم هي تروح وتتحطملي أمنيتي , واذا ماشي ملعندها اتجي ملعندي
ونعشي كي العادة راجع لعادتي الي نشوفها نقول واقيلا هاذي
حتان تعبت ومليت من حالتي لوقتاش نقعد عايش غير وحدي
زوّجت صحابي جيراني وخاوتي وزوجت الصغار، زوجت الي قدي
وانايا باقي نستنا في دالتي وقتاش نحط الخاتم في يدي
وقتاش ياربي تتحقق امنيتي و لبس برنوس تاع بابا وجدي
وقتاش تبانلي شريكة حياتي وقتاش يا ربي يالعالم بقصدي
وقتاش نكون ملموم في بيتي في وسط أهلي وزوجتي وولادي
دعيت ربي ونرجيتو فصلاتي باش يغفرلي ماعملت فالماضي
ويرزقني وحدة على حساب نيتي تكون راضية بيا و انا بيها راضي
صبرت وستنيت حتى بنتي نتي مومنة ومربية وبسيطة على قدي
سبحان الله جيتي على صيفتي تقول انا هو الي رسمتك بيدي
الحاجة الاولى قصدت اميمتي لما حكيتلها قاتلي يا سعدي
بربي هاذي الي تكون عروستي دير برك القلب واخدم يا وليدي
ولتم الي بدات تتبدل عقليتي ونشفى بلي كنت دورو ما عندي
ربي سبحانو باركلي فخدمتي وباركلي فالرزق الي في يدي
وليت نخمم وندير حساباتي نخدم ونصرف غير على قدي
وزدت قسمّت ورتبت وقاتي وليت نحسب الدقيقة كي تعدي
وزدت وليت مواظب فصلاتي وبديت نحس الراحة في جسدي
والراحة في بالي وفكل حياتي أو وليت نتمتع حتى برقادي
وحتى انتيا تانيت ضحيتي خليتي داركم وجيتي لعندي
تقاسمتي معايا هنايا وفرحتي ومهما يصرالنا قلتيلي عادي
وصبرتي معايا وطحتي ونضتي وفي كل الحالات يدك في يدي
عليها الي قلتلك حبيتك انتي ومن غيرك انت والله ما عندي
انت هي حبي وعمري وشريكتي وانت هي زوجتي ويمات ولادي.
تأليف: فيصل كرشوشكل الحقوق محفوظة