برج الحمل في الدار صندوق مخبي في وسطو ذهب وجوهر مرجان وروبا قظيفة قالولي اماليا لمن مخبيه قلتلهم لهذيك مولاة الشان مولاة المشية الظريفة. برج الثور يا لالا يا لالا يا مولاة القلب القاسي حني على حبيبك يالي طيرتي مني نعاسي ملي شفتك راني نتعذب عليك نعادي اماليا وقاع أحبابي وناسي. برج الجوزاء حكمت الطير بتكة الحرير وما ظنيته يطير من بعد ما والف خلى قفصي وعمر قفص الغير واقعدت أنا في البحور نتمشى تالف لا سواري لا قلاع لا وجدت مقاذف هذ الزمان يعطي ويخالف. برج السرطان عيطت على سيد الملاح صبت الناس رقود هزيت الدالية طاح منها عنقود النجوم قالت النجوم نحكي وقال القمر نذوب اصبر يا قلبي ياك كل شي مكتوب . برج الأسد يا للي ملكتنني بزينك يالزايدة في عذابي في الليل نومك وفي النهار نترجاك قوليلي غير كليمة يرحم اللي رباك.
برج العذراء وين الطريق اللي فيها محبوبي جيبولي التراب من ثمة نشريه نعمله جعيبة في مكتوبي وإذا مرضو عينيا نكحل بيه حبيبي ما يسمح فيا و أنا ما نسمح فيه. برج الميزان ذاك الحمام اللي محبوس في السجنة يعيا ويفرج ربي ونرجعوا خير من اللي كنا . برج العقرب يا قاعدة في الجنينة والقرقاف حذاك في النهار نتفكرك و في الليل نترجاك قلبي وصل لعندك وعينيا حشمو من بهاك ذاك البصر المفلق يما واش فيه راه القلب تعلق لمن نهديه لا طيور تزقزق لا مخبيه. برج القوس شجرة على طرف البير واعراقها دلايا يما شفت الطير وجهوا كي المرايا عليه لعقاد تسير وعليه نطوي الثنايا. برج الجدي هبط لقاع البحر، فرّشت زربية، خرجت لي جنية، قالت لي واش بيك يا بنية؟ قلت لها راحوا حبابي وخلاوني وحدانية. برج الدلو في الساقية الماء يجري والحشيش نابت متخالف بالشوك مليت حجري من هذاك الراي التالف كي غبت وغاب زهري ولا اللي يجيني خايف. برج الحوت من صاب ياربي دار بلا جيران، ومن صاب ياربي بيوت بلا بيبان، غير انا والحبيب نذكرو في اللي كان.
