الدموع الهايجا

إشراقات زينب

صادفت زمنا نبت فيه الحزن مثل الزهر البري، واتسعت فيه المقابر، تحولت بيوتات جديدة لا سقف ولا أسوارولا أبواب لها، في زمن تناسلت فيه الجنازات، جبنا المدن والقرى والمداشر والقتلة لنا بالمرصاد لم نكن نخرج من مقبرة إلا لنسكن أخرى نودع فيها عزيزا لم يشبع بعد من عطر الحياة، غابت وجوه مضيئة وقلوب بسعة البحر وعقول نيرة كان من الممكن لو أسعفها الحظ قليلا أن تخط لنا طرقا أخرى غير التي سلكناها، كنت أبحث عن ركن هادئ لألملمني وأجمع شتات ما تشظى في داخلي، سمعت نواحها وغصتها الغائرة وهي تقبل طرف الشاهدة وتتمتم « نمل ياكل نمل والباقي يجفل ولا يهمل «.
امرأة طوت العمر بكل أفراحه وأقراحه وفواجعه ومآسيه في عينين تشعان نورا، كأنها نزلت لتوها من ركن مضيء من عمق السماء لا أحد كان يحكي في حضرتها. كانت هي سيدة القول وسيدة المكان. ساد صمت رهيب ليزعزع صوتها أركان المقبرة: بْكَانَا يْذَوَّبْ الْحْجَرْ وَ يْزِيدْ يْهَدّ جْبَالُو حَمْلْنَا ثْقِيلْ وْقَلْبْنَا مَا خَفَّتْ اهْوَالُو النّجُومْ الْهَارْبَه دْلِيلْنَا فِي لِيلْ اكْحَلْ ظَلْمَه وْنَجْمَةْ الرَّاعِي تْخَبَّاتْ فِي صْدُورْ رَحَّالَه جَافْلِينْ كْوَاهُم ضِيمْ الزّمَانْ وَالدَّمْ اللِّي يَجْرِي طُوفَانْ مَنْ كَثْرَةْ لَمْحَايَنْ الْغَاشِي ضَاعْ دْلِيلُو فِي وَسْطْ الزّحَامْ الَمْدُنْ.. مْدِينَة تَبْكِي عْلَى مْدِينَه وَرْجَالْنَا كْتَاْفَها عْيَاتْ مَنْ َمْحَامَلْ الْمْقَابَرْ الطَّمَّاعَه مَا دَارَتْ قْفَالْ وْلاَ لَسْوَارْهَا دَارَتْ بِيبَانْ الدَّمْعْ النَّاشَفْ سْكُنْ الرّمَالْ وَ نْجُومْ.. نْجُومْ..عْيُونْهَا مْفَرّعَه فِي سْمَا عُمْرْهَا مَا فَتْحَتْ لِينَا بِيبَانْ وَ الْمَهْبولَه مَا زَالْهَا الدَّوَّرْ عْلَى اللِّي رَاحُو تْعَيَّطْ وَ تْقُولْ يَاكْ اجْمَلْ كِي يْطِيحْ يَكَّثْرُو ذَبَّاحُو نْجُومْ تْصَيَّحْ تَحْكِي عْلَى غُولْ فَالْخْلاَ كْثَرْ صْيَاحُو يَبْلَعْ البَرّ وَالْبْحَرْ وحَتَّى السّمَا بْزِينْ الْوَانْهَا حَبّ يْدِيرْهَا تَحْتْ جْنَاحُو يْخَليِّ لَجْبَالْ تَتْنَاطَحْ مْعَ الَجْبَالْ وْفِي حْلُوقْ النَّاسْ يْدَرِّي لَمْرَارْ بْكَانَا يْذَوَّبْ الْحْجَرْ وَ يْزِيدْ يْهَدّ جْبَالُو حَمْلْنَا ثْقِيلْ وْ قَلْبْنَا مَا خَفَّتْ هْوَالُو زْمَانَّا تْزَعْزَعْ فِيهْ كُلّْ مِيزَانْ حَتَّى اللِّي يَضْرَبْ فِي خَطّ الرّمَلْ عَقْلَهْ صَابُه لَهْبَالْ وَدْلِيلُه مَا زَالْ فِي لَغْيَبْ دَلاَّلْ يْدَرَّعْ شَجْرَه وْرَا شَجْرَا وَيْخَبِّي الطّيُورْ الْجَافْلا بِينْ اللِّي بْقَى مَنْ الَّغْصَانْ يْعَيَّطْ وَعْيَاطُو يْزَلْزَلْ فِي رُوسْ الْجْبَالْ النَّاسْ لَنَّاسْ وَالبَاطَلْ عُمْرُه مَا كَانْ وْلاَ رَاحْ يْكُونْ عْلِينَا عَسَّاسْ يَاكْ النّهَارْ يْقُولُوا عْلِيهْ قَهَّارْ عُمْرَهْ مَا يَنْطْفَى ضَوُّه وَالشَّمْسْ مَا يْغَطِّيوْهَا بْغُرْبَالْ وَكْلاَمْ الصَّحْ مَا تَتْهَزّْ لِيهْ ارْكَانْ حَتَّى فِي وَسْطْ الْمْوَاجْ الْهَايْجَه وْكَثْرَةْ الْهْوَالْ.. حَوّطَتْ بِنَا حْنَاجَرْ تْسَبَّحْ وَ يْدِينْ..يْدِينْ مَسْمُومَه فِي قْلُوبْنَا الذَّبَّحْ بَصَّحْ لَبْحَرْعُمْرُه مَا يَغْرَقْ فِي مْوَاجُو حَتَّى لَوْ كَانْ يْصِيبُو لَهْبَالْ وَعْيُونُو يْهِيجُو وَ حْنَا فِي وَسْطْ الْحَلْقَه مَا زَالْنَا كِي الْقَوَّالْ نَعَّجْنُوا الْمَاء مْعَ النَّارْ.